كوچه ميز
+ به یه ن
گؤيلومه دوشوب انزابين باغي
قديم كوچه ميزين بوتون اوشاغي
هئچ يئري دئميرم، هر شئيدن اوول
جير-جير توتدوغوموز ارسالان داغي
تيكانلي اته يي يئريميز ايدي
گؤرونردي اوردان قوربانين باغي
كلملي – كاوارلي بير سووزوخانا
چيچكلي يولجوغو بير بويونباغي
گؤرمه ين آنلاماز نه دئييرم من
نه قدر يازسام دا شئعريمي تابلو
يولداشلار بيلير دئديكلريمي
ائله بير منظره هاياندا اولو
اورا بيزيم كوچه، باخيب دئيرديك
اورا دا ائويميز، بيز گؤسته ره رديك
داغيميز سياره، بيز كيچيك شازدا
نه بيلك گولوموز دوشه جك ايتيك
باخ، او گولگزدير، او دا قيمت خالا
بوروغون آغزينا توپلاشيبديلار
او منيم آنامدير، روخساره خانيم
عطوفو گؤرمه سه قاپيسين چالار
دوواردان بويلانيب گؤورچين خانيم
ذوالفعلي- مولكعلي آناسيدير او
اينديجه يئتيشر فاطماجان خالا
بوروغون آغزيني باغلايار قونشو
جين چيراغلار يانار ائولرده گئجه
هئچ كيمين نه برقي، نه ده سويو وار
گئجه لر قارانليق اولار بو كوچه
گؤز-گؤزو گؤرمز، نابلد ييخيلار
پالتاري يويارلار آنالار چايدا
ايچمه يه اتكده بيرجه جيك شير وار
اورادا باش سينار، يازيق باجيلار
گون اورتا اولونجا نؤوبه ده دورار
او چايدا چيمرديك اوغلانلي – قيزلي
اوشاقليق چاغلاري آخ نه گؤزلدي
قورخولو گؤزوموز كوچه ده ايكن
بيريسي دئيردي: قاچ ننه ن گلدي
بورادا تيكيلدي سونرا مدرسه
چيخارديق بوروقدان نئچه محصصيل
كئشلي كيتابلار قولتوقلاريميزدا
گئديب اوخويارديق بير يابانجي ديل
قالارديم اوولده كاش يازيلان گون
ايكي ايللليك اولارديم كاشكا من هر ايل
ياشيديم ايوب تك رسسام اولارديم
چكرديم آغزيما اؤزوم آنا ديل
چكرديم تونلرين سبتچينين هئي
سوره رديم هئللتي هر آخشام باشي
رئزينين آچارديم سوپورگه چينين
قارداشيم قاييرسين بير رئزينداشي
درديمه چوخ ده ير ايندي رئزينداش
سئرچه ني وورمارام، گوناهي يوخدور
آغزيمي آل قانا دولدورانلارين
سئرچه دن هر زامان ساييسي چوخدور
بير داش آتاجاغام تئهرانا ساري
ائو اوزو گررمه ين آتاميز اوچون
آغلايا- آغلايا ائوجي ييميزده
باداملار سينديران آناميز اوچون
توپلاييب باشيما يولداشلاريمي
اؤجونو آلاندا كوچه ميزين ده
محلله م دؤنه جك ميللي مئيدانا
گوله جكدير اوزو بير تبريزين ده
خوخو
+ به یه ن
خوخو گلير، خوخو. خوخو
دئيه، سني قـورخـودوروق
سنده يـارالديريق قـورخو
ائتمه‌يه‌سن داهـا شـولــوق
سن بير اوشــاق،آنلامازدان
خوخو نه‌دير،ديكسينيرسن
تئز دويورسان اويـنـاماقدان
نه اينيرسن، نه دينــيــرسن
شنليگيني بيز آليــــــريـق
دئيه - دئيه خــوخـــو گلير
سني كـؤنـولدن سـالـيـريـق
گؤزلـريـنـه يــوخــو گلـيـر
خـوخـو سنـي سوسدورورسا
بــؤيــوكلري راحـاتــــلايير
ورهـوو اوشـاق دينج‌اوتورسا
حـاققين بـؤيـوكلـر آتـلايـير
قورخماگولوم،خوخونه‌ديـر
قـــورو اوشـاقـليـق پـايينـي
حاققينين آز چوخو نـه‌دير
دوشـون درينــدن سـايينـي
هئچ‌بير‌گوجدن‌قورخماگولوم
زور دئيه‌رلر قــورخسان اگر
اينسان اوغـلـو آ- سـونبولوم
تـك آلــلاهـا بـويـون اه‌يــر
چوخ دئييرلر كي قورخاق باش
ساغ- سالامـــات عؤمور سوره‌ر
بـــيـز گؤرموشوك‌آمماقارداش
قــورخـاقـلارا ايت يـوگـــوره‌ر
ورهـوو بـالام،سـوسـما دانـيش
راحــاتـلامـا بـــؤيـوكـــــلـري
دينج اوتورســــان،بو آلدانيش
سـارسـيداجـــاق سـومـوكلري
قـورخودوبدور، قـورخوداجــاق
خــوخــو هـلـه اوشـاقــــلاري.
قـورخـاق اوشـاق قـان اوداجاق
آخـتــاراركـن بــوجــــاقـلاري
سن بـو ائـلين ار اوغـلـوســـان
آي آتــانـيـن تـك بـــــالاسـي
اؤز يــوردونـــون نر اوغلوسان
فـخـرينـديــر بــابــك قالاسي
بـــؤيـوك اينسـان بيلمز قورخو
بــو گئــرچـه‌يـــي هئچ اونوتما
بؤيو، دوشون نه‌ديــر خـوخـــو
آمـمـا اوشـاغــي قـورخـوتـمـا
- [ 1 ]